"НВО телеарнасы сериалдарға басымдық беруді жөн санапты - онда біз де бағымызды сынап көрейік". Осылай деп мәлімдеді қазақстандық боксшы Фируза Шарипова өзінің баспасөз қызметі арқылы. Бұл туралы ҚазАқпарат хабарлайды.
Екі салмақ дәрежесі бойынша кәсіби бокстан бірқатар чемпиондық белбеулердің иегері Фируза Шарипова америкалық НВО телеарнасының бокспен жұмыс істеуден бас тартып, "Тақтар ойыны" приквелін түсіруіне қатысты пікір білдірді.
"НВО-ның бокс шоуларын трансляциялаудан бас тартқаны өкінішті. Біз Монакада өткен Sportel конвенциясында менің айқастарымды тікелей эфирден көрсету туралы, "Тақтар ойыны" танымал телехикаясындағы түсірілім туралы келіссөздер жүргізіп, ынтымақтастық жасауға талпындық. Өкінішке қарай, жаттығуларыма байланысты "Тақтар ойынына" түсе алмадым. Егер менің бос уақытым болып, телеарнамен келісе алсақ, сериалда ойнағым келеді. Себебі, НВО хикаяларға басымдық беруде. Біз келіссөз жүргізіп, бағымызды сынап көрмекшіміз", - деді спортшы.
Еске салайық, Фируза Шарипова қазіргі таңда WBC Silver белбеуінің иегері және осы ұйымның тұжырымы бойынша әлем чемпионы титулына міндетті үміткер. Оның иегері финляндиялық Ева Вальстреммен жекпе-жек 2018 жылдың желтоқсанына жоспарланған.
