Әлем чемпионы Фируза Шариповаға екі бөлмелі пәтердің кілтін табыстады. Бұл туралы Жамбыл облысы әкімінің баспасөз қызметі хабарлайды.
Бүгін Жамбыл облысының әкімі Кәрім Көкірекбаев кәсіпқой бокстан әйелдер арасында WIBA және WBU нұсқалары бойынша әлем чемпионы атанған тұңғыш қазақстандық боксшы Фируза Шариповамен кездесті.
Аймақ басшысы Фируза Шарипованы тәуелсіз Қазақстан тарихында алтын әріппен жазылатын құнды жеңісімен құттықтап, алдағы жұдырықтасар кездесулерінде тек жеңіс пен сәттілік тіледі.
"Мен шын жүректен Сізге мықты денсаулық және кәсіпқой бокста жаңа жеңістер тілеймін. Әрқашан сәттілік серік болсын, сондай-ақ біз Сіздің әр жеткен жетістіктеріңіз үшін марқайып жүреміз", – деді Кәрім Нәсбекұлы.
Өз кезегінде Фируза Шарипова сөз сөйлеп, облыс басшысына алғысын айтып, тілеулес барша жанкүйерлерінің үмітін әлі де талай додаларда ақтайтынын жеткізді.
Айта кету керек, бокстан Қазақстан республикасының спорт шебері Фируза Шарипова ағымдағы жылдың 26 тамызында Астана қаласы "ЭКСПО-2017" халықаралық мамандандырылған көрмесінің Амфитеатр сахнасында кәсіпқой болгар боксшысы Милена Колеваға қарсы кездесу өткізіп, төрешілердің бірыңғай шешімімен жеңіске жеткен болатын.
Қазіргі таңда кәсіпқой рингте сегіз кездесу өткізіп, оның жетеуінде басым түскен.
