Өңірлік коммуникациялар қызметі алаңында өткен онлайн-брифинг барысында "Алматы" Әлеуметтік-кәсіпкерлік корпорациясы" АҚ басқарма төрағасы Асқар Білісбеков Қазақстанда әлеуметтік-кәсіпкерлік корпорация алғаш рет инвестициялық санаттағы халықаралық несиелік рейтингке ие болып отырғанын мәлімдеді.
"Fitch Ratings халықаралық рейтингтік агенттігінің несиелік рейтингі - шетелдік және ұлттық валютадағы эмитент дефолтының ұзақ мерзімді "BBB-" деп аталатын рейтингі. Бұл рейтинг несие төлеу қабілетінің жақсы екендігін, несиелер бойынша төмен болжамдарды, қаржылық міндеттемелерді уақтылы өтеу мүмкіндігі дәлме-дәл бағаланатындығын білдіреді", - деді спикер.
Оның айтуынша, Fitch Алматы ӘКК-нің рейтингісін мемлекетпен байланысты компаниялардың рейтингісі әдіснамасы негізінде бағалады, өйткені ӘКК Алматы қаласы әкімдігінің меншігінде және өз қызметін жүзеге асыру үшін қалалық бюджеттен қаржыландырылады.
Мысалы, 2015-2020 жылдары Алматы ӘКК қалалық азық-түлік қауіпсіздігі қорын қаржыландыру және әлеуметтік маңызы бар азық-түлік тауарларының бағасын тұрақтандыру үшін 46 млрд теңге сомасында жеңілдетілген несиелер алды.
Алматыда әлеуметтік маңызы бар азық-түлік тауарларының бағасын тұрақтандыру мәселесі ерекше бақылауда. Алматы ӘКК бағаны ұстап тұруының басты тетіктері:
- тұрақтандыру қорынан азық-түлік интервенциясы;
- жеңілдетілген қарыз беру арқылы кәсіпкерлік субъектілерін (сауда желілері, ірі жеткізушілер) тарту.
