Оқиға Париждің XIV округінде болған. Белгісіз біреулер экс-министр мен оның жұбайын дәретханаға қамап, құны 50 мың еуро тұратын бағалы заттарды қолды қылған.
Үстеріне қара киім киген екі адам үйге ашық қалған терезе арқылы кіріп, екеуін соққының астына алған. Полицейлердің айтуынша, қаскөйлер олардың бетінен ұрған. Тонаушылар Бретонға тапанша кезеп, бағалы заттар мен ақша салынған сейфті ашуды талап еткен. Кейін экс-министр мен оның жұбайын дәретханаға қамап іздерін суытқан.
Соңғы дерек бойынша, ұрланған заттардың ішінде бір кесек алтын, гауһар таспен көмкерілген әшекей бұйым бар. Қазір жергілікті құқық қорғаушылар осы жағдайға қатысты тергеу амалдарын жүргізіп жатыр.
Тьерри Бретон 2005 және 2007 жылдары аралығында Францияның экономика министрі қызметінде болған.
Табиғат Нұрболат
