Франция полициясы терроризм қаупімен күресу аясында бір апта ішінде 250 адамды ұстады. Бұл туралы Ішкі істер министрі Жеральд Дарманен BFMTV эфирінде мәлімдеді, деп жазады inbusiness.kz.
Оның бағалауы бойынша, Францияға әзірге айқын қауіп төнбегенімен, ел ішінде террористік толқулар өте күшті.
Ол бұған дейін елдің қауіпсіздігіне қауіп төндіретін адамдарды қамтитын s тізімінде Ресейдің 60 азаматы, оның ішінде Шешенстаннан келгендер бар екенін айтқан. Франция ІІМ басшысының айтуынша, тізімдегі ресейліктердің 40-қа жуығы түрмеде отыр, Ресей билігінің келісімі бойынша шамамен 20 адам жер аударылуы мүмкін.
Бір апта бұрын, 13 қазанда Францияның солтүстігіндегі Аррас қаласында ер адам Гамбетта мектебіне пышақпен шабуыл жасады. Шабуыл кезінде бір адам, әдебиет мұғалімі қаза тауып, тағы үшеуі жарақат алды. Францияда террористік қауіп режимі жарияланды және тәртіпті сақтау үшін 7 мыңға дейін жауынгер тартылды.
