Футболдан Қазақстан чемпионаты қайта жалғасады, деп хабарлайды Olympic.kz Қазақстан футбол федерациясының баспасөз қызметіне сілтеме жасап.
OLIMPBET-футболдан Қазақстан чемпионаты 2020 жылдың 18 тамызынан бастап қайта жалғасады. Мемлекеттік органдардың талабымен ойындардың барлығы арнайы медициналық хаттаманың ережелеріне сәйкес қатаң бақылауда өтеді. Аталған құжат жарыстарды қабылдайтын спорт ғимараттарында санитариялық-эемидемиологиялық режиді қатаң сақтау үшін жүргізілетін жол картасы болмақ.
Қазіргі уақытта ойындардың барлығы "Алматы/Талғар" локациясында жанкүйерлерсіз өтеді. Стадиондарда жұмыс істейтін қызметкерлердің саны да шектеулі болмақ. Ел чемпионатына қатысатын әр клуб өзгелермен жақын қарым-қатынас орнатпай, карантин режимінде қонақүйде орналасуға жауапты болмақ. Ойыншылар мен бапкерлер, сонымен қатар, жарысты ұйымдастыруға қатысатын басқа да адамдар коронавирус індетін анықтайтын сынақты үнемі тапсырып отырады. Санитариялық-эпидемиологиялық талаптардың қатаң сақталуын Денсаулық сақтау министрлігінің өкілдері қадағалайды.
