Гаагадағы арнайы сотта Косовоның бұрынғы президенті Хашима Тачидің ісі бойынша сот процесі өтті, деп хабарлайды inbusiness.kz BBC арнасына сілтеме жасай отырып.
1997-1999 жылдары ол Сербиядан тәуелсіздік алу үшін күрескен Косово азаттық армиясын (КАА) басқарды. Айыптаулар сол кезеңмен байланысты.
Сонымен қатар Тачимен бірге сол кезде маңызды саяси лауазымдарды атқарған КАА-ның тағы үш аға мүшесі - Кадри Весели, Якуп Красничи мен Регеп Селими де сотталушылар қатарында. Олардың барлығы тағылған айыптармен келіспейді.
Прокурор Алекс Уайтинг өзінің кіріспе сөзінде Косовоны азат ету армиясының басшылығы барлық қылмыстардың бастауында тұрғанын жеткізді.
"Бұл төрт адам, сөзсіз, КАА-ның басты көшбасшылары болды және бұл үшін олар аса құрметтелді, ал енді олардың билігінің көлеңкелі тұстары бүгінгі сот талқылауының тақырыбы болады", - деді ол.
Прокурорлар Тачи мен оның сыбайластары "коллаборационистер мен сатқындарды, соның ішінде саяси қарсыластарды қудалаудың нақты әрі айқын саясатын" жүргізді деп мәлімдеді. Құрбандар албан болғанына қарамастан, көбінесе тек Сербиямен байланысы үшін ғана қудаланды, дейді прокурорлар.
"Айыпталушылар жүргізген аталмыш саясат бас бостандығынан айыруға, қатыгездікке, азаптауға, тіпті, кейде өлімге бағытталған", — деді Уайтинг. "Біз Косово бойынша жүздеген адамның тұтқынға алынып, жан түршігерлік зорлық-зомбылыққа ұшырағанын және 100-ден астам кісі өлтірілгенін дәлелдеуге ниеттіміз".
Іс Косово сотының арнайы палатасында қаралады. 2015 жылы ЕО қолдауымен құрылған арнайы палата Республика заңдары бойынша жұмыс істейді, бірақ істі қарауға халықаралық қызметкерлер тартылып, куәгерлерді қысымнан қорғау үшін Гаагада қаралады.
2016 жылы Тачи Косованың президенті болды, бірақ 2020 жылдың қарашасында сот оған әскери қылмыстар жасады деп айып тағып, содан бері Гаагада қамауда отыр.
