Жаңадан қабылданған салық кодексі бойынша, ғаламтор арқылы кәсібін жүргізетін азаматтар салық төлемейді. Желідегі жеке кәсіпкерлер 5 жылға дейін тапқан табысынан қазынаға түсім аударудан босатылмақ, деп хабарлайды almaty.tv.
"Бұрын кәсіпкерлер жеке кәсіпкер ретінде тіркеліп, тапқан табысының 2-3 пайызын салыққа төлейтін. Оны бақылау өте қиынға соғатын. Қазір 5 жылға салықтан босатылды. Бірақ қойылатын талаптар бар. Тауарды сатқанда ақша қолма-қол емес, аударым арқылы жүзеге асуы керек. Сонымен қатар, сатып алушылар мен кәсіпкер арасындағы келісім электронды түрде жүзеге асырылуы қажет", - дейді Алматы қалалық мемлекеттік кірістер департаменті түсіндіру жұмыстары басқармасының басшысы Заңғар Шындали.
Оның айтуынша, ақша айналымы аударма арақылы жүзеге асатын болса, қанша ақша айналымы болғанын көруге болады. Кәсіпкердің кәсібі 3 жылда жабылып қалған жағдайда да салықтан босатылмақ. Бірақ, базада ол туралы мәлімет сақталып қалады.
