АҚШ-тағы сауалнамалар бұл елдің азаматтары палестиналықтарға қарағанда Израильге көбірек жанашырлық танытатынын көрсетті. Сондай-ақ, олар 1300-ден астам израильдік пен 16 мыңнан астам палестиналықтың өмірін қиған соғысқа байланысты, Америка билігінің не істеуі қажет екеніне қызығушылық танытуда. Бұл туралы inbusiness.kz сайты "Голос Америки" басылымына сілтеме жасап хабарлайды.
"Сауалнама американдықтардың Палестинаға қарағанда Израильге көбірек жанашырлық танытатынын көрсетеді. Бірақ айырмашылық шамалы және жауаптың шешімін таппаған адамдар көп", – деді Жаңа Орлеандағы Диллард университетінің урбанистика және қоғамдық саясат профессоры, Роберт Коллинз.
25-27 қарашада Economist журналы мен YouGov әлеуметтану қызметі жүргізген бірлескен сауалнама американдықтардың 38%-ы израильдіктерге, 11%-ы палестиналықтарға жанашыр екенін көрсетті. Соның ішінде, респонденттердің 28%-ы екі жаққа бірдей түсіністікпен қарайды, ал 23%-ы жауапқа сенімді емес.
Коллинздің пікірінше, мұндай белгісіздік қақтығыстың күрделілігімен түсіндіріледі.
"Шетелдегі соғыстарға үңілу ішкі саясатқа қарағанда әлдеқайда қиын. Соғыс тұманына байланысты біз алатын ақпарат шектеулі, тіпті оның көп бөлігі бір-екі күнде жалған болып шығады", - деп түсіндірді ол "Голос Америки" басылымына берген сұхбатында.
Айта кетсек, сауалнамаға қатысушылардың жартысынан көбі қақтығыстың бір жағын немесе басқа жағын қолдамаса да, олардың көпшілігінің сезімі күшті.
"Әрине, мен Израиль халқын қолдаймын. Олар палестиналықтар мен ХАМАС-қа көрші елде бейбіт өмір сүруге рұқсат берді, бірақ шабуылға ұшырап, израильдіктерді зорлап өлтірді. Израильдің жауап қайтаруға құқығы бар", - деді Индиана штатының адвокаты Джефф Уильямс.
