А, Е ішек гепатиттерінің алдын алу үшін мамандар салауатты өмір салтын ұстану, сапалы ауыз су тұтыну, қатерсіз азық-түлікті қолдану, елді мекендердегі тазалықты сақтау, жеке гигиена ережелерін ұстану және халықтың санитарлық сауаттылығын арттыруға кеңес береді.
"В және С гепатиті вирустарының алдын алу үшін жеке гигиена ережелерін сақтау, медициналық қызметкерлер тарапынан қолданатын аспаптар мен құралдарын дезинфекциялауын қатаң бақылау, инъекциялық есірткі мен жыныстық қатынастан бас тарту қажет", - дейді Гепатология орталығының басшысы.
Ол өз сөзінде елімізде 1998 жылдан бастап В гепатитіне қарсы халықты вакцинациялау бағдарламасы жұмыс істейтінін, сәбилер өмірге келген алғашқы күндерінен-ақ перзентхана қабырғасында В вирустық гепатитіне қарсы инфекциядан қорғайтын вакцина алатынын, ал екпелер емханалардың егу кабинеттерінде тегін жүргізілетінін тілге тиек етті.
"ДДҰ бағалау мәліметінше, әлемде шамамен 354 миллион адам В және С вирустық гепатитімен ауырады, соның ішінде жыл сайын 3 млн адам гепатиттің осы түріне шалдығып отырады.
В гепатитімен өмір сүретін адамдардың 90%-ы және С гепатитімен ауыратын адамдардың 80%-ы өздерінің аталған вирустарды жұқтырғандарын білмейді, өйткені бауыр аурулары жиі асимптоматикалық қасиетке тән", - деп ойын аяқтады.
