Германия билігі қазан айынан кейін коронавирусты анықтайтын тестті ақылы етуді көздеп отыр, деп хабарлайды Inbusiness.kz Денсаулық сақтау министрі Йенс Спан мәлімдемесіне сілтеме жасап.
Министр COVID-19 вакцинациясын "патриоттық әрекет" деп атап, вакцинацияға қарсы тұрғындарды жақын арада тестке ақша төлеуге мәжбүр ететінін мәлім етті.
"Қазан айынының ортасынан бастап тесттің тегін болмайтыны анық", – деді ол. Шпан халықты тезірек препарат қабылдауға үндеді. "Сіз өзіңізді ғана емес, бүкіл қоғамды вирустан қорғауыңыз керек", – деді ведомство басшысы.
4 тамызда Германия билігі жаңа локдаун енгізбекші деп хабарланған еді. Бірақ бұл жолы қатаң шектеулер тек вакцинацияланбаған азаматтарға ғана бағытталды.
Германияда 8 наурыздан бастап халықты тестілеуге қатысты ереже бекітілген болатын. Ол бойынша,елдің барлық азаматтары аптасына бір рет тегін тест тапсыра алады.
Табиғат Нұрболат
