Голливуд сценаристер бес айлық ереуілден кейін жұмысын қайта бастады. Актерлермен келіссөздер жалғасып жатыр, деп жазады inbusiness.kz.
АҚШ Жазушылар гильдиясының (WGA) дауыс берген мүшелерінің 99%-ы студиялар мен стримингтік қызметтерді ұсынатын Кино және теледидар продюсерлері альянсымен (AMPTP) жаңа келісімшартқа қол қоюды мақұлдағанын хабарлады. Осылайша, Голливуд сценаристері ереуілінің соңғы нүктесі қойылды.
Жаңа келісімшарт 2026 жылдың 1 мамырына дейін жарамды болады және жазушыларға айтарлықтай жеңілдіктер береді. Атап айтқанда, олардың еңбекақысы, сондай-ақ медициналық қызмет көрсету және зейнетақымен қамсыздандыру төлемдері ұлғайтылатын болады. Студияларға сценарий жазу үшін жасанды интеллект (AI) қолдануға рұқсат етіледі, бірақ мәтінмен жұмыс жасау барысында олардың шығармалары пайдаланылған болса, авторларға хабарлауға міндетті болады. Жазушылар өз кезегінде жасанды интеллектті өздері қолдана алады, бірақ студиялар оны қолдануға міндеттей алмайды.
Сонымен қатар, Голливудта шілде айының ортасында басталған актерлер ереуілі әлі де жалғасып жатыр. Олар, сценаристер сияқты, стримингтік қызметтердің өсуі аясында жалақыларының төмендеуіне, сондай-ақ индустриядағы жасанды интеллекттің өсіп келе жатқан рөліне наразылық білдіріп келеді. Голливуд актерлер одағы SAG-AFTRA қазан айының басында AMPTP - мен жаңа келісімшарт жасасу туралы келіссөздерді қайта бастады, бірақ олардың қай сатысында екені белгісіз. Сценаристер актерлермен ынтымақтасып, киностудияларды олардың талаптарын қанағаттандыруға шақырды.
Financial Times газетінің хабарлауынша, биыл Голливудтағы сценаристер мен актерлердің ереуілдері бұл салаға 5 миллиард доллардан астам шығын келтірді (шамамен 4,7 миллиард еуро).
