Жартылай ауыр салмақта жұдырықтасатын қазақстандық кәсіпқой боксшы Али Ахмедовтің (11-0, 8 КО) қарсыласы белгілі болды. Отандасымыз Голливудта (Калифорния штаты) америкалық боксшы Хорхе Эскалантемен жұдырықтасады, деп хабарлайды vesti.kz.
"Hollywood Fight Nights 2" бокс кеші 8 тамызда өтеді. Али мен Хорхе арасындағы жекпе-жек 6 раундқа жоспарланған. Сондай-ақ бокс кешінің басты жекпе-жегі болмақ.
Бокс кешін қазақстандық танымал кәсіпқой боксшы Геннадий Головкиннің промоутері Том Леффлердің 360/K2 Promotions компаниясы ұйымдастыруда.
Алидің қарсыласы аса танымал боксшылар қатарынан емес. Жасы - 33-те. Кәсіпқой бокста бар болғаны 10 жекпе-жек өткізген. 9-да жеңіп, 1-де ғана ұтылған.
Айта кетейік, Али Ахмедов соңғы жекпе-жегін өткен жылдың желтоқсан айында өткізді. Алматыда өткен бокс кешінде әзірбайжандық боксшы Исмат Эйнуллаевты ұтты. Қазіргі таңда Big Bear лагерінде Геннадий Головкинмен бірге жаттығады.
