Орта салмақта бұрынғы әлем чемпионы қазақстандық Геннадий Головкин (38-1-1, 34 КО) бұрынғы менеджерлері Максимилиан және Олег Германдардың үстінен 3,5 миллион доллар өтемақы талап етіп арызданды, деп хбарлайды америкалық Blast басылмына сілтемемен kaz.vesti.kz.
"Сот құжаттары бойынша, Головкин ағайынды Германдар табыстар туралы есеп бермей, заңсыз комиссия алғанын айтады. Оның үстіне олар Головкиннің соңғы жекпе-жектеріне қатысы жоқ болса да, ол үшін ақы талап етіп отыр. Оның айтуынша, ағайынды Германдар GGG-мен таныстығын пайдаланып, орынсыз жерден миллиондаған доллар табыс көрген, ал енді одан да көп ақша талап етіп отыр", – деп жазады басылым.
Басылым мәліметінше, Головкин 3,5 миллион доллар шығын болғанын көрсеткен.
"Головкин ағайынды Германдармен қатынасын 2017 жылы үзген, алайда, олар келісімшарт үзілгеніне қарамастан, мексикалық Сауль "Канело" Альвареспен қарымтада табыс көргісі келген. GGG ағайынды Германдармен ынтымақтастығын ресми түрде үзіп, шығынды өтеуін талап етуде", – деп жазады Blast.
Айта кетейік, Головкиннің ағайынды Германдармен ынтымақтастығы 2006 жылы басталды. Тараптар қазақстандықтың мексикалық Сауль "Канело" Альвареспен (51-1-2, 35 КО) алғашқы жекпе-жегіне дейін ынтымақтас болды.
Головкин карьерасында осымен екнші рет сотқа жүгінеді. 2010 жылы ол Гамбург соты арқылы Universum промоутерлік компаниясымен келісімшартын үзіп, карьерасын АҚШ-та жалғастыра алды.
