Орта салмақта WBC, WBA (Super), IBF және IBO нұсқалары бойынша әлем чемпионы Геннадий Головкин америкалық Дэниел Джейкобсқа қарсы жекпе-жегі туралы пікірін білдірді.
"Үлкен жекпе-жек өтті. Бұл - бокс. Маған дәл осындай айтулы кездесулер қажет болатын. Дэнни мықты боксшы. Алғаш рет өзімді сынақтан өткіздім. Егер Дэниел екінші рет айқасқысы келсе, мен оған дайынмын", – деді Головкин.
Осы жеңісінен кейін Геннадий америкалық Бернард Хопкинстің (55-8-2, 32 КО) орнатқан рекордына жақындай түсті. Хопкинс 1995-2005 жылдар аралығында орта салмақтағы белбеулерін 20 рет қорғаған. Ал қазақстандық боксшы осымен 17-ші рет титулдарын қорғап отыр.
Осы жолы Головкин төрешілердің шешімімен жеңіске жетті. Ал Джейкобс карьерасында екінші мәрте қарсыласына есе жіберді.
