Қазақстандық кәсіпқой боксшы, орта салмақта WBA (Super), IBO, WBC және IBF тұжырымдары бойынша әлем чемпионы атағына ие Геннадий Головкин НВО телеарнасының Twitter желісінде ұйымдастырған сауалнамада үздік боксшы атанды. Бұл туралы Vesti.kz хабарлады.
GGG барлық салмақ дәрежелері бойынша үздік боксшылар арасынан топ жарды. Отандасымызды сауалнамаға қатысқан 11 мың 237 адамның 38%-ы осы атаққа лайықты боксшы ретінде таныған. Геннадий Головкиннен кейінгі орынға жартылай ауыр салмақта WBA (Super), WBO және IBF тұжырымдары бойынша әлем чемпионы америкалық Андре Уорд орналасқан. Ол сауалнамаға қатысушылардың 30% дауысына ие болған. Үздік үштікті украиналық боксшы Василий Ломаченко (21%) түйіндеген.
Айта кетейік, Геннадий Головкин келесі жекпе-жегін 16 қыркүйек күні Лас-Вегаста мексикалық боксшы Сауль "Канело" Альвареске қарсы өткізеді.
