Грекия ЭКСПО-2017 халықаралық мамандандырылған көрмесіндегі павильонына өзінің комиссарын ресми түрде тағайындады. Бұл лауазымға Грекияның экономика және даму министрлігінің бас хатшысы Илиас Ксантакос лайықты деп табылды. Бұл туралы "Астана ЭКСПО-2017" ұлттық компаниясының баспасөз қызметі хабарлады.
Грекия үкіметінің тағайындау туралы шешімі бар ресми хат Афинадағы ҚР елшілігі арқылы "ЭКСПО-2017" комиссариатының комиссарына жіберілген.
Көрмеде Грекия өкілдері халықаралық экологиялық стандарттарға негізделген энергетикалық инфрақұрлымның нақты үлгілерін ұсынбақ. Жерорта теңізінде орналасқан мемлекет жаңғыртылатын энергия көздеріне қатысты мәселеде айтарлықтай тәжірибе жинақтаған. Оның үстіне "ЭКСПО-2017" көрмесі өтетін уақыт Грекиядағы жаппай демалысқа шығатын уақытпен сәйкес келіп отыр.
Айта кетейік, Халықаралық мамандандырылған "ЭКСПО-2017" халықаралық көрмесі 2017 жылдың 10 маусымы мен 10 қыркүйегі аралығында өтеді. Бүгінде оған 112 ел мен 18 халықаралық ұйым өкілдері қатысатынын растаған.
