БАҚ-қа берген сұхбатында елдегі реформалар мен ұлттық жобалар туралы сөз қозғаған ол, халық бөлінген қаржының қалай жұмсалып жатқанын арнайы жүйе арқылы бақылай алатынын жеткізді.
"Реформаның негізгі құндылығы – оның адамға, елдің әр азаматына сай жасалынатыны. Егер әр қазақстандықтың жағдайын жақсартпаса, ол реформаларды өткізудің еш қажеті де жоқ шығар. Біз реформалаудағы қоғамдық бақылау – цифрландыру құралдарын пайдалану арқылы атқарылуы керек деп есептейміз. Барлық жоба Data Driven Government платформасы арқылы жүзеге асырылады. Цифрлық даму, инновация және аэроғарыш өнеркәсібі министрлігі ұсынатын бұл платформада қоғам ұлттық жобалардың қалай жүзеге асып жатқанын көріп отырады әрі бағалау мүмкіндігіне ие. "Халық үніне құлақ асатын мемлекет" принциптеріне сай әр қазақстандық бүкіл цифрлық ақпаратқа қол жеткізе алады. Реформа жүргізуші органдар да осы құралдардың арқасында қоғаммен байланысын күшейте түседі", - деді ол.
Сонымен қатар агенттік төрағасы мұндай реформаларға қаржы бөлу туралы ойын ортаға салды. Оның айтуынша бюджет жобалар мен басымдықтарға қатысты бөлінеді.
"Біз pay-for-results "қорытынды үшін төле" деген жүйені ұсынып отырмыз. Жобаның әр кезеңі оған дейінгі кезеңде қол жеткізген жетістігіне сай қаржыландырылады", - деді Қайрат Келімбетов.
