Fitch "Самұрық-Қазына" рейтингілерін "ВВВ" деңгейінде растады, болжам "тұрақты", деп хабарлайды қордың қоғаммен байланыс департаменті.
Fitch Ratings халықаралық рейтинг агенттігі "Самұрық-Қазына" ҰӘҚ" АҚ эмитент дефолтының ұзақ мерзімді рейтингілерін шетелдік және ұлттық валютада "ВВВ" деңгейінде "тұрақты" деген болжаммен растады. "Самұрық-Қазына" АҚ-ның ұлттық шкала бойынша рейтингісі "ААА(kaz)" деңгейінде расталды.
Fitch Ratings "Самұрық-Қазына" АҚ-ны компаниялар қоржынын басқаратын, оның ішінде құрамына Қазақстанның стратегиялық кәсіпорындары кіретін мемлекеттік инвестициялық холдинг ретінде бағалайды. Сонымен бірге "Самұрық-Қазына" АҚ бағалау кезінде қордың ауқымды мемлекеттік бағдарламаларды жүзеге асыруға қатысуы, бейінді емес активтерді жекешелендірудің мемлекеттік агенті ретінде рөлі ескерілді.
Fitch Қазақстанның экономикалық даму мен әртараптандыру саясатын жүзеге асыруда "Самұрық-Қазына" АҚ аса маңызды рөл атқаратынын атап өтеді.
Fitch Ratings талдамалық есебінің толық мәтіні 2018 жылғы 27 сәуірде жарияланды.
Айта кетсек, Fitch Ratings - америкалық корпорация, халықаралық рейтинг агенттігі ретінде белгілі. Fitch Ratings - Standard & Poor's және Moody's-пен бірге белгілі халықаралық рейтинг агенттіктерінің үштігіне кіреді.
