Дүниежүзілік туристік ұйымының мәліметтерінше, биылғы қаңтар-шілдеде халықаралық туризм нарығы 84% қалпына келді. Сарапшылар 2023 жылдың соңына дейін саяхат саласы пандемияға дейінгі деңгейге жетеді деп болжап отыр.
Айта кететіні, 2023 жылдың қаңтар мен шілде аралығында дүние жүзінде 700 млн туристік сапар жасалды. Бұл өткен жылдың сәйкес кезеңімен салыстырғанда 43%-ға жоғары. Саяхаттардың басым бөлігі шілде айына келген. Бұл кезеңде 145 млн демалыс сапарлары жасалды.
Әлемнің аймақтары арасында Таяу Шығыс, Еуропа және Африка жеті айдың ішінде ең жоғары нәтижелер көрсетті.
Дүниежүзілік туристік ұйымының мәліметтері бойынша, Таяу Шығыс елдері 2019 жылмен салыстырғанда туристерді 20%-ға көп қабылдаған. Еуропа елдерінде туристік ағын 91%-ға қалпына келді, бұған аймақ тұрғындарының, сондай-ақ АҚШ азаматтарының саяхатқа деген тұрақты сұранысы ықпал етті. Африкада туристер саны 92%-ға, Америкада 2019 жылғы деңгейден 87%-ға жетті.
