1 қазаннан бастап, Халықаралық валюта қорын Кристалина Георгиева басқарады, деп хабарлайды Atameken Business.
Ол бұрын Дүниежүзілік банкте Ресей мәселесімен айналысатын бөлімге жетекшілік еткен. Кейін осы ұйымның бас директоры болды. Еуропалық одақтан ұсынылған экономист – Болгарияның тумасы, АҚШ-та білім алған.
Георгиеваға жүктелген міндет жеңіл емес. Сауда шиеленісі өршіп, әлем экономикасының өсімі баяулаған кезде маңызды шешімдерді қабылдау – аса үлкен жауапкершілікті талап етеді.
"Көптеген елдің қарызы көбейіп барады. Басты мақсат – ұйыммен байланыс орнатқан 189 елдегі тәуекелдерді анықтап, дағдарыстың алдын алу. Болған жағдайда, оны оңай еңсеруге жағдай жасау. Экономиканың мықты болуы дұрыс ақша-несие саясатына байланысты. Басты міндет халықтың әл-ауқатын көтеру",– дейді Кристалина Георгиева.
