Премьер-министр сайтының мәліметінше, облыста пандемия кезеңінде шағын және орта бизнес субъектілерінің санын қысқартуға жол берілмеген.
Жеңіс Қасымбектің айтуынша, өткен жылы жұмыссыздық деңгейі орташа республикалық көрсеткіштен төмен болған:4,5%. Халықтың табысы да 200 мың теңгеден асқан.
"ШОБ тұрақты даму қарқынын көрсетіп отыр. Жыл соңына дейін осы динамиканың сақталуын күтеміз", – деді өңір басшысы.
Ол өңір экономикасындағы шағын және орта кәсіпкерліктің үлесі жыл сайын артып келе жатқанын, оның үлесі 16-17% деңгейінде екенін атап өтті. ШОБ барлық жұмыспен қамтылған еңбекке қабілетті халықтың 38%-ын жұмыспен қамтамасыз етіп отыр.
"Сондықтан біз ШОБ-ты дамытуға аса мүдделіміз. Осыған дейін Қарағанды шахтерлер қаласы болса, енді мұнда шағын және орта бизнес көп. Оларға жан-жақты практикалық қолдау көрсетіліп жатыр",– деді Жеңіс Қасымбек.
Облыс әкімі өңірде 90 мыңға жуық шағын және орта кәсіпкерлік субъектілері жұмыс істеп тұрғанын жеткізді. Сегменттің жыл сайынғы өсу қарқыны шамамен 10%.
