ХАМАС пен Израиль 26 қарашаға қараған түні кепілге алынған адамдар мен тұтқындарды екінші мәрте алмастырды. Ресми дерек бойынша, Израиль 39 палестиналықты, ХАМАС 13 израильдік пен 7 шетелдікті босатты, деп хабарлайды inbusiness.kz сайты.
Бір күн бұрын ХАМАС Израильді Газа секторының солтүстік бөлігіне гуманитарлық көмек әкелуге тосқауыл қойды деп айыптаған болатын. Ал Израиль "егер адамдар түн ортасына дейін жіберілмесе соғыс қимылдарын қайта бастаймын" деп мәлімдеген еді. Дегенмен делдалдардың көмегімен бұл мәселе шешілді.
24 қарашада Израиль армиясы мен Газа секторындағы ХАМАС қозғалысы арасында төрт күндік бітім орнады. Оның бірінші кезеңінде ХАМАС 13 израильдікті (дені – әйелдер мен балалар) еліне қайтарды. Израиль тұтқындағы 39 палестиналықты босатты.
