Халықаралық дзюдо федерациясы (IJF) 2021 жылға арналған жарыс күнтізбесін бекітті, деп хабарлайды Olympic.kz ұйымның баспасөз қызметіне сілтеме жасап.
18-20 ақпан күндері Тель-Авив "Үлкен Дулыға" бәсекесін қабылдайды. Аталған сында әрбір салмақтағы жеңімпаздар 1000 ұпай алатынын айта кету керек.
Наурыз және сәуір айлары да жарысқа толы болмақ: 5-7 наурыз күндері Ташкентте "Үлкен Дулыға" турнирі өтсе, 26-28 наурызда Тбилиси татамиінде кезекті жеңімпаздар анықталады.
"Үлкен Дулыға" бәсекесінің тағы бір кезеңін 1-3 сәуір аралығында Түркия қабылдайды.
8-9 мамырда әлемнің үздік дзюдошылары Париж төріне жиналады.
6-13 маусым күндері Будапештте дзюдодан әлем чемпионаты өтеді. Әлемдік додада 14 салмақ және 1 аралас командалық сын жеңімпаздары белгілі болмақ.
Ал жылдың басты оқиғасы – шілденің аяғында өтетін Токиодағы Олимпиада ойындары.
