Tesla және SpaceX компанияларын басқаратын америкалық кәсіпкер Илон Маск әлемдегі ең бай адамдар рейтингісінде үшінші орынға жайғасты. Осылайша бұл көрсеткіш бойынша ол Facebook басшысы Марк Цукербергті басып озды.
Tesla акциялары 18 Қарашада10%-ға қымбаттап, Маск шамамен 10,2 млрд доллар өндіріп алды. Сөйтіп оның байлығы 120 млрд долларға жетті. Төртінші орында Марк Цукерберг (103 млрд доллар), бесінші орынға LVMH (Louis Vuitton Moet Hennessy) компаниялар тобының бас директоры Бернар Арно табан тіреді.
Ал бірінші және екінші орында тұрғандар – америкалық кәсіпкерлер: Microsoft компаниясының негізін қалағандардың бірі Билл Гейтс (128 млрд доллар) пен Amazon корпорациясының басшысы Джефф Безос (183 миллиард доллар).
Tesla компаниясын Маск 2003 жылы құрған болатын. Ол әуел баста Tesla Motors деп аталған еді, бірақ кейінірек Tesla деп өзгертілді. Бастапқыда компания тек электромобильдерді өндірумен айналысты, бірақ соңғы жылдары күннен қуат алатын батареялар жасап, басқа да энергия жинақтаушы жүйелерді құруға бет бұрды.
Табиғат Нұрболат
