Америкалық кәсіпкер әрі миллиардер Илон Маск Венесуэланы иемденбекші, ал елдегі тәртіпсіздіктер колумбиялық есірткі трафигі мен АҚШ билігі есебінен қаржыландырылады. Бұл туралы Венесуэла президенті Николас Мадуро мәлімдеді, деп хабарлайды inbusiness.kz сайты.
"Мен бұған дейін Венесуэла әлемдік державалардың ұлттық әрі халықаралық агрессиясына тап болды деп айттым, енді Илон Маск Венесуэланы иемденіп, оны сырттан басқару идеясына құмар болып шықты", – деді Мадуро президент сарайының балконынан өз жақтастарына сөйлеген сөзінде.
Мадуроның айтуынша, елде болып жатқан мемлекеттік төңкеріс әрекеті алдын-ала жоспарланған және сайлаудан кейін Венесуэланы шарпыған тәртіпсіздіктер "колумбиялық есірткі трафигі, Илон Маск және АҚШ үкіметі" есебінен қаржыландырылған.
Венесуэладағы президенттік сайлау 28 шілдеде өтті, келесі күні Ұлттық сайлау кеңесі Николас Мадуроны 2025-2031 жылдарға сайланған президент деп жариялады, ол сайлау кеңесінің мәліметтері бойынша 51% дауыс жинады.
Дүйсенбіде Венесуэлада наразылықтар басталып, Каракаста полиция мен наразылық білдірушілер құқық қорғау органдарына тас пен бөтелкелер лақтырғанын еске саламыз. Елдің қорғаныс министрі 48 адам зардап шеккенін, бір әскери адам қаза тапқанын хабарлады. Мемлекеттік инфрақұрылымды бұзу, жеккөрушілік пен терроризм туралы істер бойынша 749 адам ұсталды.
