Илон Масктың SpaceX ғарыш компаниясына тиесілі Starship зымыраны Техастағы Starbase ғарыш айлағында өткен сынақ кезінде жарылып кетті, деп хабарлайды inbusiness.kz сайты Deutsche Welle-ге сілтеме жасап.
Бұл туралы 19 маусым күні SpaceX корпорациясының өкілдері X желісінде мәлім етті.
"Сәрсенбі күні, орталық уақыт белдеуі бойынша сағат 23:00 шамасында ұшуға дайындалып жатқан Starship зымыраны Starbase сынақ алаңында тұрған жерінде апатты жағдаймен бетпе-бет келді", – делінген мәлімдемеде.
Компанияның хабарлауынша, ешбір қызметкер зардап шекпеген.
"Жақын маңдағы елді мекен тұрғындарына қауіп жоқ. Қауіпсіздік шаралары жалғасып жатқандықтан, адамдардан ғарыш айлағына жақындамауын сұраймыз", – деп хабарлады компания.
The Verge басылымының жазуынша, жарылыс жерүсті қозғалтқыштарын тексеру сынағы кезінде болған.
