2021 жылдың екінші тоқсанында Чили экономикасы айтарлықтай өсті, деп хабарлайды Inbusiness.kz Bloomberg агенттігіне сілтеме жасап. Бұл елді індеттің салдарымен күрес үшін енгізілген мемлекеттік қаржылық ынталандыру құтқарды.
Көктемде Чилидің ЖІӨ 2021 жылдың бірінші тоқсанымен салыстырғанда 1%-ға өсті. Елдегі Орталық банктің хабарлауынша, экономика 2020 жылмен салыстырғанда 18,1%-ға артқан.
Халықаралық валюта қорының мәліметіне сүйенсек, дамушы елдердің ішінде Чили пандемияның экономикалық салдарын өтеуге ең көп қаражат жұмсады. Мемлекеттен алынған ақша тұтыну көлемінің артуына, бөлшек сауданың өркендеуіне себеп болды. Алдағы уақытта бұл көрсеткіштер өсуі мүмкін. Өйткені вакцинациялаудың арқасында коронавирус инфекциясын жұқтыру фактілері азайып, экономика біртіндеп қалпына келуде.
Чили экономикасының белсенді түрде қалпына келуі Орталық банкті өткен айда негізгі мөлшерлемені көтеруге итермеледі. Трейдерлер көрсеткіш 0,75%-дан 2,25%-ға дейін көтерілуі мүмкін деп отыр.
Табиғат Нұрболат
