Әсет Ерғалиевтің айтуынша, 2021-2024 жылдарға арналған жоба жедел және орта мерзімге арналған 70 іс-шарадан тұрады.
"Кешенді жоба бағаның өсуін тежеуге және инфляция қарқынын бекітілген нысаналы дәлізге кіргізуге бағытталған жүйелі шараларды қамтиды", – деді министр.
Оның сөзінше, жедел шаралар биыл атқарылады.
"Тауар ұсынысын кеңейту шеңберінде 16 іс-шараны іске асыру жоспарланып отыр. Әлеуметтік маңызы бар азық-түлік түрлерін сатып алуды ұйымдастыру, өндірушілердің қажеттілігін айқындау көзделген. Талдау және ұйымдастыру шаралары бойынша 7 іс-шара бар. Мұнда скрининг, сауда процестерін цифрландыру, тамақ өнеркәсібінің
жартылай жұмыс істейтін және тоқтап тұрған қуаттарын мониторингтеу мәселелері қамтылады. Сонымен қатар әлеуметтік маңызы бар азық-түлік тауарларына бақылауды күшейту көзделген. Реттеу шарасы аясында 10 іс-шара іске асырылады. Бұл жерде ішкі нарықта тапшылық немесе бағаның өсуі байқалған жағдайда шикізат пен материалдарды экспорттауға шектеу енгізу шарасы қарастырылған. Сондай-ақ атқарылатын іс-шаралар кешеніне мұнай өнімдерінің жекелеген түрлерін автокөлікпен экспорттауға 6 айға тыйым салу және медициналық қызметке кешенді тариф бекіту кіреді", – деді Әсет Ерғалиев.
Министрдің мәлімдеуінше, антимонополиялық шара шеңберінде 9 іс-шара жүзеге асырылады. Іс барысында сауда үстемелерінің негізділігін бақылауға, баға бойынша сөз байласу белгілерін анықтауға және сауда-саттыққа қол жеткізуді шектеуге бағытталған іс-шаралар назарға алынады.
Қанат Махамбет
