Біріккен Араб Әмірліктерінің бас прокуроры Хамад Саиф әл-Шамсидің 2025 жылдың қаңтарында сот талқылауын өткізуге шақырған бұйрығынан соң аталған іс шұғыл қаралған, деп хабарлайды inbusiness.kz сайты.
Абу-Дабидегі Федералды апелляциялық сот 31 наурыз күні Молдова азаматы израильдік Цви Коганды әуелі ұрлап, кейіннен өлтіргені үшін 3 өзбекстандық ер адамды өлім жазасына, төртіншісін өмір бойына бас бостандығынан айыруға үкім шығарған.
Бірауыздан қабылданған үкім сотталушыларды "террористік ниетпен қасақана кісі өлтірді" деп айыптап отыр, деп хабарлайды WAM ақпараттық агенттігі.
БАӘ мемлекеттік қауіпсіздік прокуратурасының тергеуі айыпталушының Коганды нысанаға алып, қасақана шабуыл жасағанын анықтаған. Сотқа елеулі айғақтар, яғни айыпталушының толық мойындауы, сот-медициналық сараптама қорытындылары мен нәтижелері, қылмыс қаруы және куәгерлердің сөзі ұсынылды.
Сот негізгі 3 қылмыскерді өлім жазасына кесті. Ал оларға көмектескен төртінші сыбайласы жазасын өтеген соң елден жер аударылады. Оған өмір бойына бас бостандығынан айыру жазасы тағайындалды.
БАӘ заңына сәйкес, өлім жазасына кесілген үкімдер міндетті түрде апелляцияға беріледі және оны Федералды Жоғарғы Соттың қылмыстық бөлімі барынша қарайды. Ол жазаның әділ болуы үшін өте маңызды.
Үкім шығарылғаннан соң бас прокурор әл-Шамси бұл үкім БАӘ-нің ең жоғары әділеттілік стандарттары мен заң үстемдігіне сәйкес шығарылғанын айтты. Сондай-ақ, лаңкестермен күресу, әділ сот кепілдігін қамтамасыз етудегі мызғымас ұстанымы екенін жеткізді. Ол БАӘ сот жүйесі ұлттық қауіпсіздік пен тұрақтылыққа баса мән беретінін шегелеп берді.
Бас прокурор Біріккен Араб Әмірліктері бірге өмір сүру мен толеранттылықтың жаһандық үлгісі болып табылатынын, онда заңдар діні мен этникалық тегіне қарамастан барлық тұрғынды қорғайтынын, олардың қауіпсіздігін қамтамасыз ететінін де атап өтті.
