Екібастұз қаласындағы көмір өндіру орны тариф талаптарын сақтамаған болып шықты, деп хабарлайды inbusiness.kz.
Павлодар облыстық табиғи монополияларды реттеу департаменті жүргізген талдау жұмыстары нәтижесінде "Богатырь Көмір" ЖШС тарифтік сметада көрсетілген шығындардың 5%-ын, яғни 669,2 мың теңгені игермегені белгілі болды. Сол себепті өтемақы ретінде уақытша тариф енгізілді.
"2021 жылғы 1 қараша мен 2022 жылғы 31 қаңтар аралығында аталмыш кәсіпорын жылжымалы құрамның өтуі үшін теміржолды ұсыну қызметінің тарифін 10,62 теңгеден 10,55 теңгеге дейін төмендетуі тиіс. 2022 жылғы 1 ақпаннан 2022 жылғы 31 қазанға дейін 11,12 теңгеден 10,92 теңгеге арзандауы шарт", – деп хабарлады жергілікті табиғи монополияларды реттеу департаменті.
Сонымен қатар ірі көмір кеніші тариф талаптарын сақатамағаны үшін әкімшілік жауапкершілікке тартылып, 4 млн 667 мың теңге көлемінде айыппұл төлеуге міндеттелді.
Ажар Дәулетова
