Қаңтар-шілдеде жалпы ішкі өнімнің өсуі 4%-ды құрады. Бұл туралы үкіметтің бүгінгі отырысында ұлттық экономика министрі Тимур Сүлейменов мәлім етті, деп хабарлайды abctv.kz.
"Экономиканың өсуіне инфляциялық қысымның төмендеуі, жоғары инвестициялық белсенділік және экономиканың негізгі салаларында оң динамиканың сақталуы серпін берді", – деді министр.
Оның сөзінше, инфляция жыл басынан бері 2,7%-ды құрады. Ал жылдық инфляция 5,9%-ға тең.
"Биылғы жылдың 1 тамызындағы жағдай бойынша елдің халықаралық резервтері 87,7 млрд АҚШ долларын құрады. Оның ішінде Ұлттық қордың активтері – 56,8 млрд АҚШ долларына, алтын-валюта резервтері 30,9 млрд АҚШ долларына тең болды", – деді Тимур Сүлейменов.
Оның айтуынша, Қазақстанның экономикалық даму траекториясы орташа әлемдік қарқынынан жоғары қалыптасуда. Дегенмен, министр ішкі экономикалық процестерге түзетулер енгізуі мүмкін әлемдік экономикадағы тәуекелдердің көбейгенін де еске салды.
Фархат Әміренов
