Өзбекстанның Әділет министрлігі мен елдегі Бас прокуратура Ислам Каримовтың үлкен қызы Гүлнар Каримованың Франциядағы активтерін елге қайтарды. Ресми мәлімет бойынша, олар шамамен $10 миллион долларға бағаланып отыр. Бұл туралы министрліктің баспасөз қызметі мәлім етті.
"14 мамырда Әділет министрлігі мен Бас прокуратура құзырлы органдармен бірлесе Гүлнар Каримованың қылмыстық жолмен тапқан $10 миллион көлеміндегі активтерін Өзбекстанға әкелді", — деп жазылған ресми мәлімдемеде.
Еске сала кетсек, наурыз айында Ташкенттің қалалық соты Каримованы 13 жыл 4 айға бас бостандығынан айыру туралы үкім шығарған еді. Оған қылмыстық топ ұйымдастырды, бопсалады, қылмыстық жолмен табылған ақшаны заңдастырды деген айыптар тағылды. Қазір Әділет министрлігі Каримованың $1.3 млрд тұратын активтерін қайтару мақсатында Швейцария, Франция, Ресей, Латвия және бірқатар елдің құзырлы органдарымен бірлесе жұмыс атқарып жатыр.
Табиғат Нұрболат
