Исландиядағы Рейкянес түбегіндегі жанартаудың атқылауы аяқталды. Бұл туралы Ұлттық ауа райы қызметі хабарлады, деп жазады inbusiness.kz.
"14 қаңтарда пайда болған магма каналындағы магма ағыны тоқтады, яғни жанартау атқылауы аяқталды", — делінген ведомство сайтында.
Мәлімдемеде зардап шеккен аудандардағы сейсмикалық белсенділіктің төмендеуі байқалатыны, алайда жаңа жарықтардың пайда болуымен байланысты тәуекел бары хабарланды.
Исландияның оңтүстік-батысында жанартау атқылауы 14 қаңтарда таңертең басталды. Аймақта төтенше жағдай режимі енгізіліп, Гриндавик қаласының тұрғындары эвакуацияланды. Кейінірек Исландияның азаматтық қорғаныс қызметінің бастығы Видир Рейниссон бұл атқылауды 1973 жылдың қаңтарынан бергі ең ірі табиғи апат деп бағалады.
Исландия аумағында 33 белсенді жанартау жүйесі бар. 1973 жылы қаңтарда атқылау Вестманнаэйяр архипелагының Хеймаэй аралында болды, нәтижесінде Хеймаэй қаласы іс жүзінде күлге айналды.
