"Бәйтерек" ұлттық басқарушы холдингі" АҚ басқарушы директоры Әділ Нұрғожиннің жоғары оқу орнын тәмамдап келген түлектерге көңілі толмайды.
Оның айтуынша, жас мамандардың білімі заман талабына сай емес. Осыдан-ақ университеттердегі білім сапасының көрсеткіші қандай екенін білуге болады.
"Біз мамандардың дипломына емес, қолынан қандай іс келетініне қараймыз. Себебі диплом түлектердің білімі мен білігінің нақты көрсеткіші емес. Жұмысқа қабылданған жас мамандарды 1-2 жыл ерекше бақылауда ұстаймыз. Олардың шеберлігін шыңдауға күш-жігерімізді жұмсаймыз. Қарапайым тілмен айтқанда, қайта оқытамыз. Өйткені жоғары оқу орнында алған білімдері өндіріс талабына сай емес. Әсіресе IT мамандығына байланысты беріліп жатқан білімнің қажетсіз тұсы көп. Қазіргі IT-мамандардың алып жатқан білімі жұмысқа келгенде мамандыққа түк қатысы жоқ болып қалады. 4 жыл бойы университетте алған білімі нарық сұранысын өтемейді. Мәселені шешу үшін техникалық мамандық бойынша білім беріп жатқан университеттердің бағдарламаларының өзектілігін бақылау алу қажет", – деді Әділ Нұрғожин.
Қанат Махамбет
