Италия ЭКСПО-2017 көрмесіне қызу дайындалып жатыр. Елдің сыртқы министрлігінде өткен жиында сәулетшілер өз жобалары туралы алғаш рет толыққанды ақпарат беріп, ресми мәлімдеме жасады, дееп хабаарлайды 24.kz.
Тың жобалардың жалпы құны – 1 жарым млн еуро. Халықаралық көрмеге энергетика саласында қарқынды дамыған ең ірі компаниялар келмек. Олар баламалы энергия көздерін табуға қатысты бірнеше жоспарымен таныстыруды діттеп отыр.
Италия павильонының жалпы аумағы 900 шаршы метр. Онда келушілерге 1940 жылдан бастап, бүгінге дейін энергетика саласында жеткен жетістіктері туралы баяндалады. Павильон 4 бөліктен тұрады. Әрқайсысы энергия саласында өзіндік із қалдырған италиялық ғалымдардың есімімен аталады. Тақырыбы да алуан түрлі. Ақпарат бейнематериал түрінде беріледі. Безендіру жұмысымен сәулетші Паоло Дезидери айналысты. Оның есімі Қазақстанда да кеңінен танымал. Ол "Астана Опера" театрын жобалауға қатысқан.
Айта кетейік, ЭКСПО-2017 халықаралық көрмесіне 100-ден астам мемлекет қатысады. Италия осы елдердің бірқатарымен іскерлік байланыс орнатып, тиімді келісім шарттар жасауға ниетті.
