Бұл жайтқа байланысты марқұм оқушының әкесі пікір білдірді, деп хабарлайды inbusiness.kz сайты.
Ол ит секіргенде баланың қорқып, жүрегі жарылып кеткенін айтып отыр.
Ақтөбе өңірлік коммуникациялар қызметінде полиция, білім мен денсаулық сақтау басқармасы оқиғаның мән-жайын сөз етіп, брифинг өткізген болатын.
– Жедел жәрдем бригадасына қоңырау 07:39-да түсті. 103 бригадасы 5 минутта жетті. Бала үйінде, анасының қасында болды. Балада клиникалық өлім болған. 30 минут бойы барлық реанимациялық іс-шара жүргізілді. Алайда нәтиже болмай, өлімі тіркелді, – дейді Ақтөбе облыстық денсаулық сақтау басқармасының бөлім басшысы Әлия Шарбақов.
Ақтөбе облыстық білім басқармасының басшысы Бұлбұл Күзембаева баланың небәрі 1-сынып оқитынын айтқан. Алдын ала хабар таратқан мектеп мұғалімі қате айтқанын, ешқандай да ит болмағанын хабарлаған. Десе де, баланың әкесі оқиғаны өзі түсіндіріп беруге мәжбүр болды.
– Ит болды. Өздері ұстап алып кетті. Қызыл ит. Иесі бар ма, жоқ па, білмейміз. Үстіне секірген, қорқып кетіп, жүрегі жарылды. Шындық сол. Осы арада көзімізбен көрдік. Мамасы артынан шығып келе жатты. Қасында апасы да болды, – деді қайғыдан қан жұтқан марқұмның әкесі.
