Рафахта қазір шамамен 1,5 миллион палестиналық тұрғын бар және олар үшін қазір қауіпсіз басқа пана жоқ. Осыған байланысты Израиль әскери қолбасшылығы бейбіт тұрғындарды ұрыс аймақтарынан эвакуациялау жоспарын ұсынды. Жоспарды қазір соғыс кабинеті қарап жатыр.
Мысыр палестиналық босқындардың ағылып келуіне дайын емес екенін мәлімдеп, Газа секторымен шекарадағы тосқауылдарды шұғыл түрде күшейте бастаған.
Катарда араб және батыс елдері өкілдерінің, сондай-ақ Израиль делегациясының қатысуымен келіссөздер өтіп жатыр. Олардың мақсаты – израильдік кепілге алынғандарды тезірек босату және Рафахқа жасалған шабуылдың алдын алу жолдарын табу.
ХАМАС Израилдің қарулы күштері атысты тоқтатып, Газа секторынан толығымен шығарылған жағдайда ғана кепілге алынғандарды босататынын мәлімдді. Израиль операцияны ХАМАС толығымен жойылмайынша жалғастырмақ.
Өткен демалыс күндері Парижге Израиль, Америка Құрама Штаттары, Мысыр және Катар өкілдері жиналып, тұтқындарды босату үшін уақытша атысты тоқтату туралы келісімнің жалпы жоспары туралы келісімге келді.
Газа секторының көп бөлігін Израиль әскерлері бақылайды, олар соғыс басталғаннан бер солтүстіктен оңтүстікке қарай үздіксіз ілгерілеп келеді.
Израиль қолбасшылығы әскерилер лаңкестерді анықтау және олар жасырынып жатқан жерасты туннельдерін жою операциясын жүргізіп жатқанын, сонымен бірге израильдік кепілге алынғандарды іздеп жатқанын түсіндіреді.
Израильде кепілге алынғандардың туыстары үкіметтен тұтқындарды үйлеріне қайтару үшін қолдан келгеннің барлығын жасауды талап етіп, ұдайы наразылық білдіруде. Олардың көпшілігі Беньямин Нетаньяху Хамастың шарттарын қабылдап, олармен мәміле жасауы керек деп санайды.
Қазіргі уақытта Газа секторының оңтүстік бөлігіндегі Хан-Юнис ауданында белсенді жергілікті операциялар жүргізіліп жатыр.
Әскерилердің мәліметінше, олар күніне 20-30 содырды жеңеді. Операция Насер ауруханасында аяқталды.
Рафахқа жасалған шабуылдың нақты қалай жүзеге асатыны әлі белгісіз. Израиль тек жерүсті операциясын жасай ма, әлде әуе арқылы шабуылдай ма, ешкім білмейді.
