Сапалы қызмет көрсететін министрліктердің тізімі жарияланды, деп хабарлайды inbusiness.kz порталы ranking.kz-ке сілтеме жасап.
Мемлекеттік қызмет істері агенттігі мемлекеттік қызмет көрсету сапасы мониторингінің қорытындысын шығарды. Мақсат – мемлекеттік қызмет сапасын, қызмет көрсетудің қолжетімділігін, қызмет сапасына қанағаттану деңгейін, әрі проблемалық мәселелерді анықтау.
Тізімнің көш басында Ұлттық экономика министрлігі (2020 жылы атқарылған қызметі бойынша) тұр: 4,87 балл (барлығы 5 балл), мемлекеттік қызмет алғандардың ведомство жұмысына қанағаттану деңгейі – 88,1%.
Үздік үштікке Қорғаныс министрлігі (4,86 балл, қанағаттану деңгейі – 88,7%), Сыртқы істер министрлігі (4,81 балл, 87,6%) енді.
Көш соңында Индустрия және инфрақұрылымдық даму министрлігі: 4,48 балл, қанағаттану деңгейі – 70,6%.
Сондай-ақ қызмет көрсету сапасы төмен ведомстволар қатарына Ақпарат және қоғамдық даму министрлігі (4,53 балл, 72,6%), Әділет министрлігі (4,59 балл, 79,4%), Цифрлық даму, инновациялар және аэроғарыш өнеркәсібі министрлігі (4,59 балл, 72,1%) енді.
Өткен жылмен салыстырғанда ведомстволар арасында Индустрия және инфрақұрылымдық даму министрлігінің қызмет көрсету сапасы төмендеген: минус 0,46 балл.
Кейін тізімде Цифрлық даму, инновациялар және аэроғарыш өнеркәсібі министрлігі – минус 0,35 балл, Ақпарат және қоғамдық даму министрлігі – минус 0,16, Әділет министрлігі – 0,1 балл.
Сондай-ақ 4 жылда Ақпарат және қоғамдық даму министрлігі мен Әділет министрлігінің ең төменгі орташа балы – 4,55.
Дәурен Ерболат
