Қалайы өндіруге салық көлемі қысқартылмақ

1323

 Қалайы өндіруге салық көлемі қысқартылмақ

Қазақстанда қалайы өндіруге салық көлемін азайту жоспарланып отыр. Бұл туралы парламент мәжілісінде Салық кодексінің жобасын таныстыру кезінде ҚР ұлттық экономика бiрінші вице-министрі Руслан Дәленов мәлім етті, деп хабарлайды ҚазАқпарат.

"Жер қойнауын пайдалану саласында геологиялық барлауға инвестициялар ынталандырылатын болады. Әлемдік практиканы ескеріп, көмір бойынша экспорттың жүктемесін рента салығына ауыстыра отырып, тау-кен саласы үшін үстеме пайда салығын алып тастау ұсынылады. Әлемдік тәжірибеде тау-кен саласы үшін мұндай салық жоқ. Шын мәнісінде, аталған салықты тек көмір өндіруші компаниялар төлеп келген", - деп түсіндірді Дәленов.

Оның сөзіне қарағанда, табысты барлау жүргізуді ынталандыру мақсатында коммерциялық анықтау бонусын алып тастау жоспарлануда. Теңіз және терең мұнай кен орындары үшін жер қойнауын пайдалануда өте қарапайым баламалы салық ұсынылады. Қатты пайдалы қазбаларды барлауды жеделдету үшін жалдау төлемдерінің тетігі енгізіледі. Инвесторларды ынталандыру үшін дивидендтерді және 35 пайыздан артық өндірілген шикізатты өңдеген жағдайда, жер қойнауын пайдаланушы акцияларының өсімін корпоративтік табыс салығынан босату ұсынылып отыр. Белгілі болғандай, мұнай мен газды өзіндік құнынан төмен өткізу кезіндегі кірістерді анықтау бойынша тәсілдер қайта қаралады.

"Сондай-ақ қалайы бойынша пайдалы қазбаларды өндiруге арналған салығының мөлшерлемесін 6%-дан 3%-ға төмендету ұсынылады. Бұл металлургияның жаңа саласы - қалайы өнеркәсібін қолдау үшін жасалып отыр", - дейді ол.

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу