Кәсіпқой бокстағы жолын сәтті бастаған Қамшыбек Қоңқабаев жекпе-жектен кейін Olympic.kz сайтына сұхбат берді.
"Кәсіпқой бокс пен әуесқой бокстың әрқайссының өзіне тән ерекшеліктері болады. Кәсіпқой бокс он екі раунда созылатындықтан жекпе-жекті асықпай бастап, төзімділікке жұмыс істейсің. Ал әуесқойда үш раунд болғандықтан уақыт аз, жекпе-жекті бірден бастап кетесің. Сондықтан, кәсіпқой бокс пен әуесой бокстың жекпе-жектерінде де, жаттығулары мен раундтарында да айырмашылықтар болады. Жекпе-жек барысында жаттықтырушылардың айтқан тактикасы бойынша жұмыс істедім. Бір қолмен қадағалай отыра, екінші қолмен шабуыл жасап отырдым. Жекпе-жек сегіз раундқа жоспарланған еді. Алайда, екінші раундта қарсыласты нокаутпен жеңдім. Кәсіпқой бокста жекпе-жек өткізуімдегі негізгі мақсат – Олимпиада ойындарына тыңғылықты дайындалу, мықты болып бару. Менің қазіргі таңда тек қана бір мақсатым бар. Ол – Олимпиада алтыны. Осыған орай, кәсіпқой бокста жекпе-жек өткізіп, өзімді жан-жақты шыңдап жатырмын. Кәсіпқой бокстағы жолым сәтті болғанымен Олимпиада алтынына дейін мен әуесқой бокстан кетпеймін", – дейді Қамшыбек Қоңқабаев.
Айта кетерлігі, Қамшыбек Қоңқабаев 23 тамызда Алматыда өткен кәсіпқой бокс кешінде Иса Ақбербаевты жеңді.
