72-ші Халықаралық Канн фестивалі аясында Қазақстанның ұлттық павильоны өз жұмысын бастады. Бұл туралы мәдениет және спорт министрі Арыстанбек Мұхамедиұлы хабарлады.
"Биылғы жылы қазақстандық павильонның жұмысында 15-тен астам іс-шара өтеді, оның ішінде режиссер Сергей Дворцевой және 2018 жылғы Канн фестиваліндегі үздік әйел рөлінің иегері, мақтанышымыз Самал Еслямовамен кездесу ұйымдастырылмақ", – деп жазды министр әлеуметтік желіде.
Бағдарлама кең және танымдық болады деп күтілуде: Қазақ Ұлттық Өнер Университетінің "Кино және ТВ" кафедрасының тұсаукесері, көркем өнер саласындағы презентациялар мен зерттеулер, Қазақстандағы деректі және өмірбаяндық кинолар, екі халықаралық кинофестиваль: Almaty film festival және "Ұшқын" студенттік кинофестивалі, кинорежиссерлердің толық метражды жобалары: Аян Найзабековтың "Толғау", Ерлан Нұрмұхамбетовтың "Махаббат күндері", Әнуар Райбаевтың "Ақиқат сәті", Төлеген Байтукеновтың Native Brothers таныстырылымдары өтеді.
