Еnergyprom.kz аналитикалық порталының жазуынша, Қазақстанда болат өндірісі 18% қысқарған. Өндіруші үш өңірдің ішінде тек Қарағанды облысының көрсеткіштері оң.
"Қара металлургия өндірісі қаңтар-тамыз аралығында 6,2% кеміп, 1,1 трлн теңгенің өнімі шығарылды. Өндіріс көлемі екінші жыл қатарынан азайып отыр. Былтыр өндіріс көлемі 2019 жылмен салыстырғанда 6,8% аз боп шыққан", - деп жазады Еnergyprom.kz .
Саладағы жетекші үш облыстың екеуінде әзірге табыстан шығын көп. Ал Қарағанды облысындағы ArcelorMittal 8 айда 442,3 млрд теңгенің өнімін шығарып, былтырғы көрсеткішін 8,5% жақсартқан. Ал Павлодар облысындағы KSP Steel мен Ақсу ферроқорытпа зауыты 286,6 млрд теңгенің өнімін өндірген. Бұл былтырғыдан 18,7% аз. Ақтөбе облысындағы ферроқорытпа зауыты 202,6 млрд теңгенің өнімін шығарып, былтырғы межеден 14,6% төмен нәтиже көрсетіп отыр.
Саладағы жағымсыз динамика, әсіресе, болатты өңдеместен шикізат ретінде өткізуге машықтанған кәсіпорындарға тиімсіз болып тұр. Ал болат қаңылтырмен қапталған сэндвич-панелдерге керісінше сұраныс 31,4%-ке артқан.
