Қарағанды хайуанаттар бағына ұрғашы гималай аюы қоныстанды, деп жазады inbusiness.kz сайты.
– Гималай аюын алу менің арманым болды. Біз оны Алматы хайуанаттар бағынан сатып алдық. Бұл ұрғашы, көк-қара түсті аю. Ол бізде өте тез бейімделді. Бірден алдына қойған тамақты ішіп-жей бастады. Яссури өз есімін өте жақсы біледі, бірден жауап береді. Ол үшін біз қоршауды жөндеп, таспен жауып, шатыр жасадық, өйткені Гималай аюлары биіктікке оңай және қорықпай көтеріледі. Яссури өте белсенді. Ол біздің климатымызға жақсы бейімделді, оған қамқорлық жасайтын қызметкерге де үйреніп келеді. Біздің хайуанаттар бағын жануарлардың басқа түрлерімен толықтырғым келеді, – дейді хайуанаттар бағының директоры Гүлнар Адамбекова. – Біз Ресей хайуанаттар бағымен келіссөздер жүргізіп жатырмыз. Егер Табиғат қадағалау органы біздің шарттарымызды қарап, басқа хайуанаттар бағында еркек аюды сатып алуға рұқсат берсе, онда Яссуридің жұбы болады.
Гималай аюы Халықаралық Қызыл кітапқа енгізілген. Оның тіршілік ету ортасының көп бөлігі Шығыс Азияда. Батыста ол Ауғанстанда, содан кейін Гималайдың оңтүстік беткейлерінде, Қытайдың оңтүстігінде және шығысында, Корей түбегінде, кейбір Жапон аралдарында кездеседі. Қиыр Шығыстың оңтүстігінде Гималай аюлары қоңыр аюларға қарағанда көбірек.
Дене бітімі бойынша олар қоңыр аюдан кішірек және тұмсығы сәл ұзындау болатынымен, құлақтары өте үлкен және жүні қалың қара түсті болатынымен ерекшеленеді.
