Қарағанды облысы Наурыз мерекесіне орай ұйымдастырылған "Күй күмбірі" республикалық челленджін қолдады. Өңір бойынша бір уақытта 10 мыңға жуық жас домбырашы күйлерді орындады, деп хабарлайды inbusiness.kz сайты.
Қарағанды қаласында мектептер мен қосымша білім беру ұйымдарының 500 оқушысы қазақтың халықтық аспаптық өнерінің белгілі туындыларының бірі – "Ерке сылқым" күйін бір мезетте орындады. Бұл шығарма кездейсоқ таңдалған жоқ: ол көптеген жас музыканттарға таныс және ұлттық музыканың мінезі мен ырғағын сезінуге мүмкіндік береді.
"Бізге бірнеше күй ұсынылды, соның ішінен белгілі қазақ композиторы Әбдімомын Желдібаевтың "Ерке сылқым" күйін таңдадық. Бұл – домбыра үйреніп жүрген барлық балалар сүйіп орындайтын дәстүрлі күй: оны үйрену оңай әрі әуезді", – дейді облыстық білім басқармасының тәрбие жұмысы және қосымша білім беру бөлімінің бас маманы Сарқыт Үсенова.
Іс-шара ауқымды деңгейде өтті. Акция облыстың барлық өңірінде қолдау тапты.
"Мұндай акциялар оқушылардың ұлттық мәдениет пен музыкаға деген қызығушылығын арттырады. Өнер көрсетілімінен кейін балалар қайта қашан қатыса алатынын сұрады. Бұл олардың өнерге деген тұрақты қызығушылығы қалыптасып келе жатқанын білдіреді. Сонымен қатар, біздің ауданда үйірмелерге әртүрлі ұлт өкілдері қатысады және олардың барлығы домбыраны жақсы меңгергенін көрсетіп отыр", – деді Нұра ауданы Балалар мен жасөспірімдер шығармашылығы орталығының директоры Ақан Махаметчюин.
Балқаш қаласында С. Сейфуллин атындағы №7 мектеп-гимназиясының оқушылары "Тепеңкөк" халық күйін орындап, мерекелік көңіл-күйді қолдады.
Челлендж Қазақстан Республикасы Оқу-ағарту министрлігінің бастамасымен ұйымдастырылып, ұлттық мәдени мұраны сақтау және насихаттау, өскелең ұрпақтың рухани-адамгершілік құндылықтарын дамыту және жастар арасында домбыра өнеріне деген қызығушылықты арттыруға бағытталған.
