Қарағанды қаласы мен оған іргелес серіктес қалаларды газдандыру жұмыстары жалғасып жатыр. Соңғы жылдары жеке секторда тұратын мыңдаған тұрғын тұрмысқа қолайлы әрі экологиялық жағынан тиімді отынға көшу мүмкіндігіне ие болды, деп жазады inbusiness.kz сайты.
2025 жылы газ тарату желілерін салу жұмыстары үш қалада — Қарағанды, Теміртау және Шахтинскте жүргізілді. Жалпы ұзындығы 269,5 шақырым болатын газ құбырлары салынды. Негізгі жұмыс көлемі Қарағандыға тиесілі: мұнда 171 шақырым желі тартылды. Теміртауда 63 шақырым, ал Шахтинскте 35,5 шақырым газ құбыры салынды.
Қарағандыда шамамен 10 мың үй газға қосылу мүмкіндігіне ие болды, олардың 7199-ы техникалық шарттарын рәсімдеген. Теміртауда 6500 үйге газ желісі жеткізіліп, олардың үш мыңға жуығы техникалық шарттар алған.
Қосылу рәсімдері жалғасып жатыр. Қазіргі уақытта газбен жабдықтау жүйесіне 7527 абонент қосылған. Бұл желілер жеткізілген үйлердің жалпы санының 45,6 пайызын құрайды.
Қарағанды қаласын газдандыру кезең-кезеңімен жүзеге асырылып, 16 іске қосу кешені мен құрылыстың төрт кезегін қамтиды. 2025 жылға дейін бірінші кезектің бірінші, екінші және үшінші іске қосу кешендері пайдалануға берілді. Өткен жылы тағы екі ірі кезең аяқталды: ұзындығы 109 шақырымды құрайтын, 2477 шығу нүктесі бар төртінші іске қосу кешені және ұзындығы 62 шақырым, 1356 шығу нүктесі қарастырылған бесінші іске қосу кешені.
2026 жылы жұмыстар жалғасады. Тағы шамамен 90 шақырым газ тарату желісін салу жоспарланып отыр. Бірінші кезектің алтыншы іске қосу кешенін жүзеге асыруға арналған жобалық құжаттама дайындалды. Бұл жоба Таугүл және Күнгей шағын аудандарын қамтиды.
Сонымен қатар биыл жетінші іске қосу кешенінің бірінші кезегінің, сондай-ақ бірінші және екінші іске қосу кешендерінің екінші кезектерінің құрылысын бастау жоспарланған. Газдандырудың жетінші кешені жеке сектордағы бірқатар көшелерді қамтиды: Рыбная, Кондитерская, Керамическая, Гончарная, Балхашская, Кирпичная, Четская, Стекольная, Спасская, Ключевая, Дүйсембеков және басқа да көшелер. Жалпы жоба 1801 абонентке арналған: шамамен 65 шақырым газ желісі тартылып, орта және төмен қысымды 19 газ реттеу пункті орнатылады.
Теміртауда газдандыру жобасы толық көлемде аяқталды. Ол сегіз іске қосу кешенін және құрылыстың үш кезегін қамтып, нәтижесінде 6500 үйге газ жеткізілді.
Ал Шахтинскте жұмыстар жалғасып жатыр. Мұнда жалпы ұзындығы 229,22 шақырым болатын газ тарату желілерін салу жоспарланған. Бұл 2480 үйге газ жеткізуге мүмкіндік береді. Қазіргі уақытта "Шахтинск" автоматтандырылған газ тарату станциясының және ұзындығы 18 шақырым, диаметрі 530 миллиметр болатын жоғары қысымды газ құбырының құрылысы аяқталды.
Сонымен қатар Солтүстік-Батыс шағын ауданында 16,5 шақырым газ құбыры төселді. Қаланың орамішілік газ желілерін салу жұмыстары басталып, 35,5 шақырым құбыр тартылды.
