Қарағанды облысында ең жас полицей жолдағы қауіпсіздікке үлес қосып жатыр. Жол ережелерін жетік меңгерген балақай әлеуметтік желі қолданушылары арасында кеңінен танымал.
Ол Қарағанды – Алматы бағытындағы республикалық маңызы бар тасжолда полиция қызметкерлерімен бірге жүргізушілерге түсіндіру жұмыстарын жүргізді.
Нұрасыл лейтенант шенін тағып, арнайы нысандық киім киіп, тәртіп сақшыларымен иық тіресе қызмет етті.
Ол жүргізушілерге жол-көлік оқиғаларының алдын алу үшін басты ережелерді түсіндіріп, жылдамдықты асырмау, қарсы бағытқа шықпау және жолда демалысты ескерусіз қалдырмау қажеттігін ескертті.
Полиция болуды армандайтын Нұрасылдың бұл қызығушылығы бекер емес – оның әкесі де патрульдік полиция батальонының қатарында қызмет атқарады.
– Қазіргі таңда жол қозғалысы қауіпсіздігі – күн тәртібіндегі ең өзекті мәселелердің бірі. Жаз мезгілінде Қарағанды – Балқаш бағыты бойынша көлік ағыны күрт артады. Осыған байланысты аталған жолда полиция нарядтарының санын арттырдық. Бұрын бұл бағытта 17 автопатруль жұмыс істесе, қазір олардың саны 30-ға жеткізілді. Әр патруль бекетінің арақашықтығы шамамен 10 шақырым. Қоғамдық қауіпсіздікке үн қосқан ең жас полицейдің бастамасы – баршаға үлгі. Бұл шара тұрғындар арасында құқықтық мәдениетті арттыруға бағытталған іс-шаралардың бір бөлігі ретінде ұйымдастырылды, – деді патрульдік полиция батальонының командирі Медет Нұрмұханов.
