Қарқаралы ауданының Егіндібұлақ ауылында қазақ елінің ғұлама биі Қазыбек бидің 350 жылдық мерейтойына арналған салтанатты шаралар бастау алды, деп хабарлады облыс әкімдігінің баспасөз қызметі.
Өз өлкесіне монументалды нысанды Ғани Омаров есімді бизнесмен сыйлаған екен. Меценат Астана қаласында тұрып, жұмыс істейді, алайда Егіндібұлақта оның туып-өскен үйі бар.
Кәсіпкердің айтуынша 12 метрлік стеланы жасауға төрт айдай уақыт кеткен.Оны әзірлеп, орнатуға 20 млн. теңге жұмсалған. Бұл мерейтойға орай жасалған жалғыз ғана сыйлық емес. Елді мекенде демеушілер есебінен спорт алаңы салынған.
Егіндібұлақта дүниеге келген танымал суретші Кәріпбек Күйіков тарихи-өлкетану мұражайына "Қаз дауысты Қазыбек би" суретін сыйға тартты. Өзінің туып өскен ауылының кітапханасына ол қазақ өлеңдері жинағынан құралған 3 диск және "Көшпенділер" кітабының 3 томын, ал жергілікті әкімдікке Қазақстан туын сыйлады.
Сыйлық жасаған әрбір абзал жанның әрекеті Елбасы бастаған "Туған жер" бағдарламасына енеді.
Егіндібұлақта жоғары лауазымды қонақтардың қатысуымен салтанатты шаралар жалғасын табады. ҚР Мемлекеттік хатшысы Гүлшара Әбдіқалықова келеді деп күтілуде. Мерекелік шаралар киіз үйлерден құралған үлкен қалашықта өтеді. Театрландырылған көріністер, концерт, ақындар арнауы және спорт ойындары ұйымдастырылады.
Қазыбек бидің 350 жылдығын тойлау шаралары үш ай жалғасады. Алдағы уақытта бірнеше мәдени және ғылыми шаралар ұйымдастырылады деп жоспарланған.
Айта кетейік, Қаз дауысты Қазыбек би, Қазыбек Келдібекұлы – қазақ халқының XVII – XVIII ғасырлардағы ұлы үш биінің бірі, көрнекті қоғам және мемлекет қайраткері. Орта жүз арғын тайпасының қаракесек руына кіретін болатқожа атасынан шыққан ол 1667 жылы Сыр бойында дүниеге келген. Арғы аталары Шаншар абыз, Бұлбұл, өз әкесі Келдібек — есімдері елге белгілі әділ билер болған.
