Қарағанды облысының әкімі Ермағанбет Бөлекпаевтың төрағалығымен өткен отырыста ТЖ алдын алу және жою бойынша өткен жылдың қорытындылары шығарылып, 2023 жылға арналған жоспарлар айтылды. Өзекті мәселелерді талқылауға облыстық ведомстволардың басшылары, қалалар мен аудандардың әкімдері қатысты, деп жазады inbusiness.kz Қарағанды облысының әкімдігіне сілтеме жасап.
Жыл сайын азаматтық қорғау күштерін материалдық-техникалық жарақтандыруға қаражат бөлінеді.
– Өткен жылы қаражат космомониторингке, жарылыс жұмыстарын жүргізуге, 20 бірлік түрлі техника сатып алуға қаржы лизингін өтеуге, техниканы, өрт-техникалық және құтқару жабдықтарын сақтауға арналған жеті ангарды сатып алуға бағытталды, – деді Қарағанды облысы ТЖ департаментінің бастығы Мұрат Қатпанов.
Өңірде шалғай ауылдарда өрт сөндіру бекеттерін кезең-кезеңімен құру жалғасуда. Соңғы 5 жылда 45 бекет ашылды. Олардың қарамағында 47 мыңнан астам адам тұратын 82 елді мекен бар.
Шомылу кезеңіндегі балалар мен ересектердің қауіпсіздігі де талқыланды. Өткен жылы 15 адам суға батып кетті, оның ішінде 6 бала. Көп жағдайда басты себеп – жабдықталмаған жерлерде шомылу. Мұрат Катпановтың пікірінше, бұл мәселені коммуналдық жағажайларды ашу және модульдік рамалық бассейндерді орнату арқылы шешуге болады.
Ермағанбет Бөлекпаев бұл мәселеде Табиғи ресурстар және табиғатты пайдалану басқармасының, қалалар мен аудандар әкімдерінің кемшіліктерін атап өтті. Облыс әкімі шомылу үшін қосымша жабдықталған орындарды ұйымдастыру міндетін қойды.
– Алдын алу жұмыстарын жүргізгендеріңіз жақсы. Бірақ бұл жеткіліксіз. Әр қалада және ауданда қауіпсіз жүзу үшін жағдай жасаңыздар. Бұл бірнеше өмірді сақтауға көмектеседі. Мен барлық мәселелер бойынша нақты шешімдер күтемін, – деп атап өтті өңір басшысы.
Отырыста теміржол көлігіндегі ТЖ мәселесі көтерілді. Қабылданған қауіпсіздік шаралары туралы "Қарағанды жол бөлімшесі – жүк тасымалы" АҚ филиалы директорының м. а. Қайролла Сәдуақасов есеп берді. Төтенше жағдайларға жедел әрекет ету үшін теміржолшылардың қарамағында төрт қалпына келтіру және төрт өрт сөндіру пойызы бар. Штат тәжірибелі қызметкерлермен жабдықталған.
