Қарағанды облысында ауа райының күрт нашарлауына байланысты уақытша жабылған автожолдардан 600-ден астам көлік полицияның ұйымдасқан сүйемелдеуімен қауіпсіз аймақтарға жеткізілді, деп жазады inbusiness.kz сайты.
Қауіпсіздікті қамтамасыз ету мақсатында Қарағанды облысы аумағындағы бірқатар автожол учаскелерінде көлік қозғалысына уақытша шектеу енгізілді.
Атап айтқанда, Қарағанды – Балқаш және Балқаш – Қарағанды бағыттарында 600-ден астам көлік жиналған. Жүргізушілер мен жолаушылардың қауіпсіздігін қамтамасыз ету үшін Қарағанды облысы Полиция департаментінің патрульдік полиция батальоны мен аумақтық бөлімшелердің жеке құрамы жұмылдырылды. Көліктер кезең-кезеңімен ұйымдасқан түрде сүйемелденіп, жолдың ең қауіпті учаскелерінен шығарылды.
Қарағанды облысы ПД бастығының орынбасары Жасқайрат Қайыровтың айтуынша, бұл кезеңде полиция қызметкерлері күшейтілген режимде жұмыс істеген.
– Біздің басты міндетіміз – азаматтардың өмірі мен денсаулығын сақтау, сондай-ақ автожолдарда төтенше жағдайлардың алдын алу. Осы бағытта барлық қажетті шаралар қабылданып жатыр, – деді ол.
Полиция департаментінің мәліметінше, шектеу енгізілген уақытта кейбір азаматтар наразылық білдірген. Алайда полиция қызметкерлері қозғалысқа тыйым салу тек қауіпсіздік мақсатында енгізілетінін түсіндірген.
Сонымен қатар, ресми шектеулерге қарамастан, жабық жол учаскелеріне шығуға әрекет жасаған жағдайлар да тіркелген.
– Мұндай әрекеттер адамдардың өмірі мен денсаулығына тікелей қауіп төндіреді, – деп атап өтті Жасқайрат Қайыров.
Демалыс күндері жабық жолға шыққаны үшін төрт жүргізуші әкімшілік жауапкершілікке тартылған. Полиция департаменті енгізілген шектеулерді елемеу деректеріне қатысты ұстаным өзгермейтінін және мұндай құқық бұзушылықтар заңнамаға сәйкес қатаң түрде тоқтатылатынын мәлімдеді.
